भाजपच्या हैदराबादमध्ये पार पडलेल्या राष्ट्रीय कार्यकारिणीच्या बैठकीत दारूचे वाटप? वाचा सत्य!

नुकतीच तेलंगणाची राजधानी हैद्राबादमध्ये भाजपच्या राष्ट्रीय कार्यकारिणीची बैठक पार पडली. या बैठकीनंतर सोशल मीडियामध्ये एक व्हिडीओ व्हायरल होतोय. व्हिडिओमध्ये गळ्यात भारतीय जनता पक्षाचा गमजा आणि टोपी घातलेले लोक दारूचे वाटप करताना बघायला मिळताहेत. व्हिडीओ शेअर करताना दावा केला जातोय की हा व्हिडीओ हैद्राबादमध्ये पार पडलेल्या राष्ट्रीय कार्यकारिणीच्या बैठकीदरम्यानचा आहे.

प्रख्यात विधिज्ञ प्रशांत भूषण यांनी आपल्या अधिकृत ट्विटर हॅण्डलवरून हा व्हिडीओ शेअर केलाय. पंतप्रधान नरेंद्र मोदींना उद्देश्यून प्रशांत भूषण लिहितात की मोदींच्या कार्यकर्त्यांनी तर तेलंगणाला देखील गोव्यामध्ये परिवर्तित केले आहे. प्रशांत भूषण यांचं ट्विट जवळपास 4000 युजर्सकडून रिट्विट करण्यात आलंय.

अर्काइव्ह

पडताळणी:

व्हायरल व्हिडीओ नेमका कधीचा आणि कुठला आहे हे पडताळण्यासाठी आम्ही युट्यूबवर किवर्डसच्या साहाय्याने शोध घेतला. आम्हाला ‘युपी तक’ या युट्यूब चॅनेलवरची 21 डिसेंबर 2021 रोजीची बातमी बघायला मिळाली. बातमीनुसार उत्तर प्रदेशच्या विधानसभा निवडणुकी दरम्यान काँग्रेसच्या ट्विटर हॅण्डलवरून हा व्हिडीओ शेअर करण्यात आला होता. दरम्यान, व्हिडीओ नेमका कुठला आहे याबाबतची माहिती मात्र या बातमीमध्ये देण्यात आलेली नाही.

आम्हाला ‘न्यूज 24’ या वृत्तवाहिनीच्या युट्यूब चॅनेलवर देखील हा व्हिडीओ बघायला मिळाला. काँग्रेस नेते बीव्ही श्रीनिवास यांनी हा व्हिडीओ हरिद्वार येथील जेपी नड्डा यांच्या रॅलीदरम्यानचा असल्याचा आरोप केला होता.

उत्तराखंड काँग्रेसचे प्रभारी देवेंद्र यादव यांनी देखील 20 डिसेंबर 2021 रोजी हा व्हिडीओ ट्विट केला होता. त्यांनी देखील व्हिडीओ भाजपचे राष्ट्रीय अध्यक्ष जेपी नड्डा यांच्या हरिद्वार रॅलीदरम्यानचा असल्याचे म्हंटले आहे.

वस्तुस्थिती:

‘चेकपोस्ट मराठी’च्या पडताळणीमध्ये स्पष्ट झाले आहे की सोशल मीडियावरील भाजप कार्यकर्त्यांचा दारूचे वाटप करत असतानाचा व्हायरल व्हिडीओ हैदराबादमधील राष्ट्रीय कार्यकारिणीच्या बैठकी दरम्यानचा नाही. हा व्हिडीओ डिसेंबर 2021 मध्ये देखील व्हायरल झाला होता. याचाच अर्थ असा की व्हिडीओ किमान सहा महिन्यांपूर्वीचा आहे.

काँग्रेसकडून हा व्हिडीओ भाजपचे राष्ट्रीय अध्यक्ष जेपी नड्डा यांच्या हरिद्वार येथील रॅलीदरम्यानचा असल्याचे सांगण्यात आले होते. आम्हाला मात्र व्हायरल व्हिडीओ नेमका कधीचा आणि कुठला याची खात्रीलायक माहिती मिळू शकलेली नाही.

हेही वाचा- आश्चर्यच! दुबईच्या हॉटेलला फिरते मजले? जाणून घ्या व्हायरल व्हिडिओचे सत्य!

(तुम्हालाही एखाद्या बातमीच्या खरेपणावर संशय आहे? एखादा फोटो किंवा व्हिडीओ चुकीच्या माहितीसह व्हायरल होतोय असे वाटतेय? मग अशी संशयास्पद माहिती आमच्या (9172011480) या अधिकृत व्हाट्सएप नंबरवर पाठवा. आम्ही तुमच्यासाठी बातमीची सत्यता पडताळू.

आपण फेसबुक, ट्विटर आणि इंस्टाग्रामच्या माध्यमातून देखील आमच्याशी जोडले जाऊ शकता)