सोशल मीडियावर एक फोटो व्हायरल होतोय. फोटोमध्ये एक मुलगी हातरिक्षा ओढत असताना दिसतेय. या रिक्षामध्ये एक वृद्ध व्यक्ती बसलेली बघायला मिळतेय. दावा केला जातोय की फोटो कोलकात्यातील असून रिक्षा ओढणारी मुलगी आयएएस टॉपर असून आपल्या रिक्षाचालक वडिलांना रिक्षातून कोलकाता शहर फिरवत आहे. या या कृतीतून ती आपल्या वडिलांप्रतीची कृतज्ञता व्यक्त करत असल्याचं सांगितलं जातंय.
फेसबूक आणि ट्विटरवर हा फोटो मोठ्या प्रमाणात व्हायरल होतोय.
पडताळणी:
स्पर्धा परीक्षांचे निकाल लागल्यानंतर खडतर परिस्थितीला सामोरे जात यश मिळवणाऱ्या अनेक यशोगाथा प्रमुख माध्यमांतून, सोशल मीडियाद्वारे समोर येतात. यादरम्यान काही खोटे दावे देखील व्हायरल केली जातात.
सध्या व्हायरल होत असलेला फोटो रिव्हर्स सर्च द्वारे पडताळून पाहिला असता व्हायरल फोटो २०१८,२०१९ मध्ये देखील मोठ्या प्रमाणात व्हायरल झाला होता असे लक्षात आले. त्यावेळी देखील सदरील मुलगी ही कोलकाता येथील रिक्षा चालकाची मुलगी असून तिने आयएएस परीक्षेत यश मिळवल्याचा दावा करण्यात आला होता.
तामिळनाडूतील काँग्रेस नेते अस्लम बाशा यांनी देखील ऑक्टोबर २०१८ मध्ये आपल्या अधिकृत ट्विटर अकाऊंटवरून हा फोटो शेअर केला होता.
हाच व्हायरल फोटो आम्हाला wildcraftin ई कॉमर्स साइटच्या अधिकृत इंस्टाग्राम अकाउंटवरून देखील शेअर करण्यात आल्याचे आढळले. फोटोच्या कॅप्शनमध्ये देण्यात आलेल्या माहितीनुसार फोटोत दिसणाऱ्या मुलीचे नाव श्रमोना असल्याचे समजले.
श्रमोना पोद्दारने देखील आपल्या misti.and.meat या अधिकृत इन्स्टाग्राम हँडलवरून २८ एप्रिल २०१८ रोजी हा फोटो शेअर केल्याचे आम्हाला बघायला मिळाले.
श्रमोना ही एक प्रसिद्ध ट्रॅव्हल ब्लॉगर आहे. फोटो शेअर करताना तिने कोलकात्यातील रिक्षा चालकांच्या खडतर परिश्रमाविषयी सहानुभूती व्यक्त केलीये. wild craft या ई-कॉमर्स साईटच्या #ReadyForevAnything #WildcraftWilding या कॅम्पेनसाठी हा फोटो काढण्यात आला होता.
व्हायरल फोटो २०१८ मध्ये मोठ्या प्रमाणात चुकीच्या दाव्यासह शेअर करण्यात आल्यामुळे श्रमोनाने याविषयी खुलासा करणारी एक फेसबूक पोस्ट देखील ५ ऑक्टोबर २०१८ रोजी केली होती. यात व्हायरल फोटोमूळे आपल्याला त्रासाला सामोरे जावे लागत असून सदरील फोटो wild craft च्या कॅम्पेन साठी काढण्यात आल्याचे तिने पुन्हा एकदा स्पष्ट केले होते.
वाईल्डक्राफ्ट कंपनीकडून देखील ट्विटच्या माध्यमातून व्हायरल फोटो संदर्भात खुलासा करण्यात आला होता.
वस्तुस्थिती:
रिक्षा चालकाच्या मुलीने आयएएस परीक्षेत यश मिळवत आपल्या वडिलांना रिक्षात बसवून कोलकाता शहरात फिरवल्याचे सांगत व्हायरल केला जाणारा फोटो खरा आहे. मात्र या फोटोतील मुलगी आयएएस परीक्षेतील टॉपर नसून प्रसिद्ध ट्रॅव्हल ब्लॉगर श्रमोना पोद्दार आहे.
सदर फोटो २०१८ मध्ये काढण्यात आलाय. Wild craft या ई कॉमर्स साईटच्या #ReadyForevAnything #WildcraftWilding या कॅम्पैनसाठी हा फोटो काढण्यात आला होता.
हेही वाचा: पितृ पक्षातील अमावस्येला प्रकट झालेली नदी दिवाळी अमावस्येला अदृश्य होते?
(तुम्हालाही एखाद्या बातमीच्या खरेपणावर संशय आहे? एखादा फोटो किंवा व्हिडीओ चुकीच्या माहितीसह व्हायरल होतोय असे वाटतेय? मग अशी संशयास्पद माहिती ‘चेकपोस्ट मराठी’च्या 9172011480 या अधिकृत व्हाट्सएप नंबरवर पाठवा. आम्ही तुमच्यासाठी बातमीची सत्यता पडताळू.
आपण फेसबुक, ट्विटर आणि इंस्टाग्रामच्या माध्यमातून देखील आमच्याशी जोडले जाऊ शकता)
[…] हे ही वाचा- युपीएससी टॉपर मुलगी वडिलांना रिक्षात… […]