भारतीय जनता पक्षाचे नेते, लोकसभा अध्यक्ष ओम बिर्ला यांची मुलगी अंजली बिर्ला पहिल्याच प्रयत्नात UPSC परीक्षा पास (om birla daughter ias) झाल्याच्या बातम्या सर्व माध्यमांत झळकल्या. त्या पाठोपाठ सोशल मीडियातून दावे होऊ लागले आहेत की अंजलीने घरबसल्या, एकही परीक्षा न देता वशिल्याने हे IAS पद पदरात पाडून घेतलंय.
हेच दावे व्हॉट्सऍपवर देखील व्हायरल होत असल्याचे ‘चेकपोस्ट मराठी’चे वाचक संजय सोनटक्के यांनी निदर्शनास आणून दिले आणि पडताळणीची विनंती केली.
पडताळणी:
‘चेकपोस्ट मराठी’ने व्हायरल दाव्याची पडताळणी करण्यासाठी ऍडव्हान्स कीवर्ड सर्च केले. यामध्ये आम्हाला अंजली बिर्ला यांनी ‘द क्विंट’ला दिलेले परीक्षेचे ऍडमिट कार्ड मिळाले. त्यावरील परीक्षा क्रमांकावरून इतर माहिती मिळवणे सोपे झाले.
UPSCच्या अधिकृत वेबसाईटवर UPSC २०१९च्या मुख्य परीक्षेचा निकाल घोषित करण्यात आलेला आहे. त्या पत्रकावर अंजली बिर्ला यांचे नाव, परीक्षा क्रमांक आम्ही पडताळून पाहिला. सर्व माहिती तंतोतंत जुळणारी आहे.
मुख्य (मेन) परीक्षेत जर अंजली बिर्ला पास झाल्याचा निकाल दिसत आहे तर अर्थातच प्रिलिमिनरी म्हणजे पूर्वपरीक्षेच्या निकालाच्या यादीतही त्यांचा रोल नंबर असणे आवश्यक आहे. याचीही पडताळणी आम्ही UPSCच्या अधिकृत वेबसाईटवर केली असता त्यांचा परीक्षा क्रमांक आम्हाला यादीत सापडला.
वस्तुस्थिती:
लोकसभा अध्यक्ष ओम बिर्ला याच्या मुलीने अंजली बिर्लाने ‘द क्विंट’ला पाठवलेल्या ऍडमिट कार्डवरील परीक्षा क्रमांक आणि UPSCच्या पूर्व आणि मुख्य परीक्षांच्या निकालातील क्रमांक हेच सांगत आहे की अंजली बिर्ला यांनी दोन्ही परीक्षा दिल्या होत्या. त्यांना घरबसल्या परीक्षा न देता IAS पद (om birla daughter ias) मिळाल्याच्या सोशल मीडियातील दाव्यास पुष्टी मिळेल असा एकही पुरावा आढळला नाही. त्यामुळे व्हायरल दावा निराधार असल्याचे ‘चेकपोस्ट मराठी’च्या पडताळणीत स्पष्ट झाले.
हेही वाचा: ‘इस्लामिक स्टडीज’ विषयामुळे युपीएससीत यशस्वी मुस्लिम उमेदवारांची संख्या वाढलीये?
Be First to Comment