सोशल मीडियावर एक व्हिडीओ व्हायरल होतोय. व्हायरल व्हिडिओमध्ये एक व्यक्ती आपल्या दोन्ही हातावर उलटी उभी राहून एका मंदिराला प्रदक्षिणा घालत असताना बघायला मिळतेय. व्हायरल व्हिडीओ शेअर करताना दावा केला जातोय की ही व्यक्ती दुसरी-तिसरी कोणी नसून देशाचे पंतप्रधान नरेंद्र मोदी (Narendra Modi) आहेत. त्यांनी आपल्या वयाच्या 26 व्या वर्षीच केदारनाथ धामची प्रदक्षिणा पूर्ण केली होती.
पडताळणी:
व्हायरल व्हिडिओच्या किफ्रेम्स रिव्हर्स सर्चच्या आधारे शोधल्या असता 26 जून 2021 रोजी हाच व्हिडीओ युट्यूबवर अपलोड करण्यात आला असल्याचे बघायला मिळाले. व्हिडिओच्या कॅप्शनमध्ये मंदिराला प्रदक्षिणा घालणारी व्यक्ती केदारनाथ धामचे पुजारी संतोष त्रिवेदी असल्याचे सांगण्यात आले आहे.
आम्हाला ‘इंडिया टीव्ही’च्या युट्यूब चॅनेलवरून 2020 मध्ये अपलोड करण्यात आलेला दुसरा एक व्हिडीओ देखील मिळाला. यामध्ये देखील एक व्यक्ती व्हायरल व्हिडीओमधल्या पद्धतीनेच केदारनाथ धामची परिक्रमा करताना दिसत आहे. इंडिया टीव्हीच्या रिपोर्टनुसार, केदारनाथ धाम मंदिराचे पुजारी संतोष त्रिवेदी यांनी 2020 मध्ये आंतरराष्ट्रीय योग दिनानिमित्त हा योग केला होता.
केदार ट्रस्टशी संबंधित ट्विटर हॅण्डलवरून देखील 21 जून 2021 रोजी हा व्हिडीओ ट्विट करण्यात आला होता. ट्विटच्या कॅप्शनमध्ये तीर्थ पुरोहित ‘आचार्य श्री संतोष त्रिवेदी’ केदारनाथ मंदिरात आंतरराष्ट्रीय योग दिन साजरा करत असल्याचे सांगण्यात आले होते.
वस्तुस्थिती:
‘चेकपोस्ट मराठी’च्या पडताळणीमध्ये स्पष्ट झाले आहे की सोशल मीडियावरील व्हायरल व्हिडिओमध्ये दिसणारी व्यक्ती पंतप्रधान नरेंद्र मोदी नसून केदारनाथ धामचे पुजारी संतोष त्रिवेदी आहेत. सोशल मीडियावर हा व्हिडीओ चुकीच्या दाव्यांसह व्हायरल होतोय.
हेही वाचा- पाण्याची पातळी वाढल्याने धबधब्यात वाहून जाणाऱ्या पर्यटकांचा ड्रोन व्हिडीओ कारवारचा नाही! वाचा सत्य!
(तुम्हालाही एखाद्या बातमीच्या खरेपणावर संशय आहे? एखादा फोटो किंवा व्हिडीओ चुकीच्या माहितीसह व्हायरल होतोय असे वाटतेय? मग अशी संशयास्पद माहिती आमच्या (9172011480) या अधिकृत व्हाट्सएप नंबरवर पाठवा. आम्ही तुमच्यासाठी बातमीची सत्यता पडताळू.
आपण फेसबुक, ट्विटर आणि इंस्टाग्रामच्या माध्यमातून देखील आमच्याशी जोडले जाऊ शकता)
Be First to Comment