काँग्रेस नेते राहुल गांधी (Rahul Gandhi) यांचा एक व्हिडिओ व्हायरल होतोय. व्हायरल व्हिडिओमध्ये राहुल गांधींच्या शेजारची व्यक्ती कुठल्याशा मंदिरात देवीची आरती करत असताना बघायला मिळतेय. त्यानंतर आरती करणाऱ्या व्यक्तीकडून आरतीचे ताट राहुल गांधींकडे दिले जाताना राहुल गांधी आपल्या शेजारच्या व्यक्तीशी बोलत असल्याचे बघायला मिळतेय.
राहुल गांधींचा हा व्हिडीओ शेअर करताना दावा केला जातोय की व्हिडीओ राहुल गांधींच्या भारत जोडो यात्रेदरम्यानचा (Bharat Jodo Yatra) असून त्यांनी नवरात्रोत्सवादरम्यान दुर्गामातेची आरती करण्यास नकार दिला.
पडताळणी:
व्हायरल व्हिडिओच्या किफ्रेम्स रिव्हर्स सर्चच्या साहाय्याने शोधल्या असता आम्हाला पत्रकार सुप्रिया भारद्वाज यांच्या अधिकृत ट्विटर हॅण्डलवरून 27 सप्टेंबर 2017 रोजी करण्यात आलेल्या ट्विटमध्ये हा व्हिडीओ बघायला मिळाला. या व्हिडिओमध्ये राहुल गांधी आरती करताना बघायला मिळतात.
व्हिडीओ गुजरातच्या राजकोटमधील गरबा कार्यक्रमामधील असल्याची माहिती देण्यात आलेली आहे. व्हिडिओमध्ये राहुल गांधी याच्या व्यतिरिक्त दिवंगत काँग्रेस नेते राजीव सातव, गुजरात काँग्रेसचे नेते भारत सोळंकी आणि राजस्थानचे मुख्यमंत्री अशोक गेहलोत देखील बघायला मिळताहेत.
ANI या वृत्तसंस्थेच्या अधिकृत ट्विटर हॅण्डलवरून देखील 27 सप्टेंबर 2017 रोजीच यासंदर्भात ट्विट करण्यात आले होते. यामध्ये देखील राहुल गांधी आरती करत असताना बघायला मिळताहेत.
वस्तुस्थिती:
‘चेकपोस्ट मराठी’च्या पडताळणीमध्ये स्पष्ट झाले आहे की राहुल गांधींनी दुर्गा मातेची आरती करण्यास नकार दिल्याच्या दाव्यासह व्हायरल होत असलेला व्हिडीओ एडिट करण्यात आला आहे. मूळ व्हिडिओमध्ये राहुल गांधी आरती करताना दिसताहेत. मूळ व्हिडिओही छेडछाड करून अर्धवट व्हिडीओ शेअर केला जातोय. शिवाय व्हिडीओ सध्याच्या भारत जोडो यात्रेदरम्यानचा नसून पाच वर्षांपूर्वीचा आहे.
(तुम्हालाही एखाद्या बातमीच्या खरेपणावर संशय आहे? एखादा फोटो किंवा व्हिडीओ चुकीच्या माहितीसह व्हायरल होतोय असे वाटतेय? मग अशी संशयास्पद माहिती आमच्या (9172011480) या अधिकृत व्हाट्सएप नंबरवर पाठवा. आम्ही तुमच्यासाठी बातमीची सत्यता पडताळू.
आपण फेसबुक, ट्विटर आणि इंस्टाग्रामच्या माध्यमातून देखील आमच्याशी जोडले जाऊ शकता)
Be First to Comment